Brigitte Miremont, écrivaine occitane vient d'éditer un livre+ CD sur son oncle, "Pèire Miremont, 1901-1979, escrivan oblidat del Perigòrd negre", florilège de l'oeuvre de l'auteur, majoral du Félibrige, originaire du sarladais.
« L'òbra de mon oncle es rica e plan variada. A escrich quaranta sieis libres, dins tos los genres e los estiles : poesia, pròsa, teatre, racontes, estudis lingüistics. Pasmens, me sei rendut compte qu' es pas mai conegut. Endonc, me sei botada a tornar legir tota son òbra per ne'n tirar 128 textes. Qualques uns son revirats en francés, mas en generau quò's mas en occitan.
Per comprener l'òbra, cal saber la vita de l'òme e la de mon oncle fuguet plan rica. A viscut un pauc pertot. Quò's benleu per aquò que l'an un pauc oblidat en Perigòrd. Lo libre que parlam es un un pauc un mescladis de sa vita e de son òbra. Podem lo segre, dempuei la periòda d'avant-guerra, quante escriguet en Perigòrd o en Roerga sas prumièras parucions, de las peças de teatre. Era soldard dins las annadas 20 dins la Ruhr onte escriguet "Ressons de Ruhr". La magèr part de son òbra fuguet escricha quand era en captivitat en Alemanha onte demoret pendant cinc ans. Dins l' "Oflag" onte era, fondet emb dels companhs, "L'escòla dels embarbelats", onte cade jorn fasian una activitat culturala. D'aquela periòda, avem "Darrer'ls barbelats", que conta la vita enlai, e "Planh de faidit", un recuelh de poemas.
Aprep la guerra, a fait de las conferèncias sur la lenga d'òc e lo Felibritge. Faguet pareisser tot un fum d'estudis sur lo Perigòrd negre : "Biais de dire", "Proverbis e dictons del Perigòrd" e "La syntaxe occitane du Périgord". Sas darrièras publicacions eran daus contes risolièrs, coma "Espofinadas". Mas son cap d'òbra es de segur "Muratel", lo trabalh d'una vita, enquera disponible au Bornat dau Perigòrd e dins qualquas librarias. Aquel libre reçaubet lo premi Joseph Salvat en 1976.
Per far auvir son trabalh, ai damandat a Monica Burg e Daniel Chavaròcha de legir setze textes que trobaretz sur lo CD a gratis emb lo libre. La prefacia de Joan Rigosta ne'n ditz belcòp sur la qualitat del trabalh de Pèire Miremont. Espèri que tot aquò vai balhar enveja de ne'n saber mai sus l'òbra de mon oncle !
"Pèire Miremont, 1901-1979, escrivan oblidat del Perigòrd negre", 125 pages+ 1 CD 15 titres, édit par l'Asco Sarlat, prix de vente 20€, l'occasion de redécouvrir l'un des grands écrivains du Périgord noir.
Denis Gilabert